ذكريات اليوم الاول

السلام عليكم ورحمة الله وبركاته

بالامس كان أول يوم في السنة الدراسية الجديدة وكل سنة وانتو طيبين

بس السنادي بالنسبالي مش زي أي سنة , السنادي هي الاخيرة ليا في التعليم ان شاء الله

مش عارف ليه وقفت مع نفسي وقعدت افتكر ذكريات يومي الاول في الدراسة وانا داخل أولى ابتدائي

قعدت افتكر كده وسالت نفسي يا ترى هو ايامها كنت أحسن ولا دلوقت انا احسن ؟

ياترى طول فترة 15 سنة اتعلمت اللي كان المفروض اتعلمه ؟

وصلتت للي أنا عايزة ولا لأ ؟

بصراحة مش عايز اخبي بس انا نفسي احترت قوي

هو الحمد لله على كل حال في الاول والاخر

بس المقارنة دي بتخلي الواحد محتار شوية

لاني على العلم اللي اتعلمته والخبرات الكتير اللي اكيد أي واحد بيكتسبها من فترة تعليمه وبتخليه مؤهل للخروج في المجتمع كعنصر بناء مش مجرد شخص يعوله افراد أخرون وكل وظيفته هي التعليم

كل دا في ناحية وان الواحد شايف برضو انه فقد كتير من براءته كطفل واكيد زي ما بيقولو الزمن جه عليك وعلمك حاجات غصب عنك وفي سلوكيات كتير انت رافضها بس بتعملها عشان المجتمع كله كده

في نظري هي دي الخسارة اللي خسرتها وكان يهمني قوي انها كانت تتحط في كشف الارباح مش الخساير

بس عموما الوضع ليس بهذا السوء لكن الشعور دائما بخسائر من الناحية العلمية والخلقية بيسبب أزمة كبيرة لاي شخص إلا اذا كان الشخص دا فقد الضمير او أي نوع من أنواع المسئولية ودول اعتقد اني الحمد لله عندي جزء كبير منهم لسه محتفظ بيه


برضو افتكرت مواقف حصلتلي وانا في بداية مشواري الدراسي ومنها الطريف طبعا

اول حاجة افتكر ان الوالد والوالدة بيقولوي اني كنت مهتم جدا بالمدرسة حتى من قبل ما ادخلها بسنتين وكنت بطلب منهم الدفاتر والاقلام والبرايات بالظبط زي ما اللي داخلين المدارس بيطلبوا من أهليهم وفعلا من وانا 5 سنين وانا كنت جاهز بالعدة ومستني اكمل ال 6 وادخل المدرسة
زهقنا يا شيخ من اللعب في البيت

اول يوم دراسي بقى دا اللي كان يوم عجيب
اكتشفوا ايامها اني كنت مفكر المدرسة هيا الباص اللي بشوف العيال بيركبوه كل يوم الصبح ويرجعوا الضهر
اتاري انا مفكر انهم بيتفسحوا طول اليوم في الباص
مش عارف ان الحكاية فيها قعدة و كتب ومدرسين وموال كبير
مش بقولكم كنت برئ لسه

طبعا بعد ما فوقت من الصدمة في اول يوم بعد الاكتشاف الرهيب ان المدرسة دي اسم يطلق على مبني مش باص
نزلت اول يوم من الباص وسبت الشنطة والكتب والزمزمية وراجع البيت جري بقى عشان افوق
لولا ساتر ربنا في زملا عرفو شنطتي وشالوها معاهم ورجعوهلي طبعا بالليل
وربنا برئ قوي

هيييييييه ايام حلوة قوي والله ياريت تعود
عشان كده دايما الكبار بيتمنوا عودة ايام الصبا علطول
اول مرة احس بالاحساس دا بجد
واقول
الا ليت المعيلة تعود يوما ,,, فاخبرها بما فعل التعليم فينا

عموما لا وقت للبكاء على اللبن المسكوب

بعترف دلوقت ان حالتي أسواء بكتير من ما كنت اتمنى اوصله في احلامي الصغيرة
بس اعتقد ان السنادي هي فرصتي للتعويض ان شاء الله
واولها لازم التعويض في التقديرات لأن تقديراتي السنين اللي فاتت كانت سيئة ومش هعلقها على اي شماعة بجد
لأني قصرت كتير قوي لحد ما وصلت لحالتي دي
وسمعت النهاردة كلمة حلوة قوي بجد
الطيارة بتكون عرضة للسقوط أكتر من أي وقت في مرحلتين ,, مرحلة الصعود , ومرحلة الهبوط .


الصعود عدا بكل حلاوته ومرارته
فاضل ليا الهبوط
وان شاء الله يكون هبوط موفق
بس محتاجة شوية دعوات منكم على كتير من الشغل مني

تحيتي ,,