M O V E | H E A T

يوم ديبياك Depiak's Day

| 21 October 2008


السلام عليكم ورحمة الله وبركاته

بسم الله الرحمن الرحيم


اليوم كان يوم إستثنائي من أيامي في الكلية .

طبعا طلبة هندسة المنصورة يعرفوا أكتر إيه السبب .

النهاردة كان ميعاد حدث من الأحداث إل
لي بتدي الطلبة أمل إن ممكن يكون في حاجة كويسه فعلا في ظل الظروف الكويسة اللي بنشوفها في التعليم الجامعي بشكل عام .

مش هطول بس يعني ايه depiak ؟



وإيه هي الكات دي كمان ؟


ال CAT إختصار لـ Computer Assistant Team وهو فريق من طلبة جامعة المنصورة المهتمين بالكمبيوتر وتكنولوجيا المعلومات ..
أنشأ أصلا في كلية الهندسة في أواخر التسعينات ولكن حصل ظروف وتوقف لمدة من الزمن واستأنف العمل تقريبا في 2004 .

النهاردة هو أكبر فريق في جامعة المنصورة و بجد الناس دي حاجة تشرف وعلامة مضيئة في مسيرة جامعتهم .

كل فصل دراسي بيقوموا Scope وهو عبارة عن 3 ايام من الندوات اللي بيقدمها طلبة من الجامعة وكلها مواضيع شيقة ما شاء الله .

أنا شخصيا عايز اقول إني بعترف أنهم أثروا جدا في حياتي الجامعية ويمكن في مستقبلي بشكل عام و حقيقي في ناس كتير زيي كده ومقدرين كويس اللي أنا بقوله دلوقت .

الباعث على الأمل إنهم طلبة زينا زيهم محدش ساعدهم هما اللي ساعدو نفسهم ويعرفو يخرجوا نفسهم ويخرجوا ناس كتير معاهم من السطحية اللي في الحياة الجامعية وقدرنا نشوف بعيينا إن ممكن فعلا يكون في نشاط طلابي مفيد لكل الناس مش بس من كلية الهندسة لأ من كل الكليات وأي حد مهتم بالمجال دا عموما , وإن الوقت مش متأخر أبدا عشان تبني نفسك و تبني مستقبلك بايدك .

دا بس إعتراف صغير بتأثير الناس دي فيا وأتمنى التوفيق ليهم دايما ويفضلوا شعلة أمل لكل الطلبة اللي الجايين إن شاء الله ..


وزي ما قلت النهاردة كان يوم depiak ودي فرع من الـ CAT مهتم بالويب و التصميم ..
يذكر إن في فروع تانية في الـ CAT وهي :
depiak دا اسم مجموعة فرعية من فريق ال CAT ...
  • H4ck3rs ودول إهتمامهم منصب على علوم الكمبيوتر بشكل عام , هاردوير و أنظمة تشغيل , برمجة ,,,مصادر مفتوحة , شبكات .... إلخ.
  • pixicat للمهتمين بالجرافيك :)
  • depiak للمهتمين بالويب .
  • CSED لطلبة التحكم .
- fighters وواضح من اسمهم إنهم مقاتلين ,, بتوع التحدي . هدفهم هما المناسفة الشريفة بين الاعضاء في تعلم حاجة جديدة أيا كامنت .

دا الموقع الرئيسي للكات

ودا موقع الدبياك

خش وخدلك لفة وشوف شغل شباب جامعة المنصورة ..


سلام ,,

My new flash memory :)

| 17 October 2008
السلام عليكم ورحمة الله وبركاته


دي وهي لسه متغندرة في البترينه


قولوا ما شاء الله


حجمها كبير قوي
العلم تقدم برضو



فرق يين اربعة جيجا وأربعة جيجا برضو




مش باينة في النص
ولا انت واخد بالك :))



ياتري يا هل ترى عشان نكمل ال 320 جيجا محتاجين كام فلاشة

حد شاطر رياضة ؟



سلام


عودة الدسك الضال !!!

| 15 October 2008


السلام عليكم ورحمة الله وبركاته


لمدة اسبوعين بحالهم وانا
offline ٍ
وقطعا السبب معروف

العودة للكليات

تتم تتم
موسيقى عسكرية ,,,, وقرآن

وطبعا لا أخفيكم سرا يعني ايه خير اللهم اجعله خير
نفس الشعور بتاع اول اسبوعين من كل سنة دراسية

هو بغبوته

لا تغيير


^
^
^

احباااااااااااااااط شديد مصاحب لموجهات انهزامية عنيفة أدت إلى تصدعات وتشققات ,,,,,


كل حاجة ماشية غلط
والحمد لله على كل حال

ان كانت الدراسة ولا المشروع
ولا الجدول
آه من الجدول
ملوش راس من رجل

عموما مش هدوش دماغ سعادتكم باي إحباط انا عايش فيه عشان الظاهر مفيش فايدة
على رأي هاني رمزي


نيجي بقى لمهجة حياتي

حليب قلبي

اللي مدوخني وراه

بس بحبه

بحبه يابابا

بموت فيه

my pc


طبعا في موجة الاحباط اللي فاتت دي لازم طبعا حبيبي يحط بصمته
يعني هو اسمنت أسيوط أحسن منه

عمل فيا فصل بايخ طبعا
كنت بلعب كالعادة في ال partitions
وفتحت الجهاز ملقيش اتنين منهم
أختفوا

طبعا مش هقول انا نمت يومها ازاي
عشت يوم ما يعلم بيه الا ربنا
نمت وعيناي مغرورقة بالدموع
وخلاص كمان شوية الدمعة هتفر من عيني زي البتوع اللي بيطلعوا في الكرتون دول

والبايانات اللي راحت مهمة جدا جدا جدا
وللاسف مفيش معايا نسخة باك آب منها

سبحان الله
من خبرات العك القديم اللي كنت بعمله افتكرت برنامج بيعمل recover for deleted partitions
لم اتردد
فتحت البرنامج وشغلته
على أمل ,,,

المهم تركت البرنامج شغال ونزلت الكلية
اتصلت بعد كام ساعة اتطمن
كان الرد:
" احنا قفلنا الجهاز ,,
هو انت كنت سايبه شغال على حاجة ؟"

ياولاد الـ.............

طيب

ماشي


ما علينا المسامح كريم
رجعت الساعة 8 شغلت البرنامج تاني

مش هقول بقى انا اعصابي ازاي ساعتها
تمالكت نفسي و شغلته تاني
وقاعد ادعي ربنا ...
آه مهو البني آدم كده ميفتكرش ربنا الا ساعة الشدة

" وإذا مس الإنسان ضر دعا ربه منيباً إليه ثم إذا خوله نعمة منه نسي ما كان يدعو إليه من قبل و جعل لله أنداداً ليضل عن سبيله قل تمتع بكفرك قليلاً إنك من أصحاب النار " [الزمر:9]

نعوذ بالله أن نكون من هؤلاء
بس هي غفلة بقى
ربنا يثبتنا على الإيمان

شغلت الجهاز على البرنامج تاني
وحوالي الساعة 12 بالليل كده تقوم أختي الصغيرة راحة تجيب كتابها من جنب الكمبيوتر - مش عارف ايه اللي وداه هناك أصلا -
تهز السلك
الكمبيوتر يقفل

اللهم اخزيك يا شيطان

صراحة ساعتها حسيت ان خلاص مفيش أمل بقى
وعليه العوض ومنه العوض في شقى التسع شهور اللي فاته ونبدأ من جديد بقى
وخلاص

,,,
شغلت الجهاز تاني وسبته
طبعا بعد ما كشرت عن أنيابي لكل اللي في البيت
وعملت حظر تجوال جنب الكمبيوتر
وقلتلهم حسكم عينكم الاقي حد ماشي من غير البطاقة ولا الكارنية بتاعه او من غير تصريح رسمي

اصل انا عارفهم
قال ايه رايحين يشربو من التلاجة
عارف انا الحركات دي
- بالمناسبة لو مرجعتش هنا تاني اعرفو اني رحت في داهية بسب الكلمتين دول
آخرة السياسة بقى :)) -


نزلت الكلية تاني و طبعا خلاص
بعتها بقى

اتصلت على 12 الضهر بعد 12 ساعة
الحمد لله
الاخبار السعيدة
ال partition المهم رجع
الحمد لله
الف حمد وشكر ليك يارب

الحمد لله الذي فرج علينا بعد الضيق

وشوفوا بقى فرج ربنا لما يجي
بعد المكالمة قابلت زميل عايز يشتري هارد جديد
طبعا مسكت فيه
حبيب قلبي
وحكيتله عن هاردي بقى
وكنت هعيطله شوية كمان

المهم قالي متخافش يابني
أنا قررت أساعدك
أشترى هارده
وروحنا فضينا هاردي على هارده و فرمتنا الهارد وحلينا المشاكل وكله تمام

وأطمنكم دلوقت الهارد طبيعي والحمد لله
ورجعنا بقى للعب في الانظمة


أما انا لسه مجرب الـ open suse
انما ايه ,,, تحفة بجد

ليا عودة ان شاء الله عشان احكيلكم عن مغامراتي مع توزيعات اللينكس

بس اتعلمت بعد كده ابقى اشيل البيانات المهمة على اي cd او dvd
وخدت إجراء احترازي اخر واشتريت فلاشة جديدة
مهي البلية لعبت بقى

وإن شاء الله هوريكم الفلاشة دي قريبا ,,,

انتظروني


بس اتركوني افرح شوية بالدسك الضال
والم ما بعثرة اللعب بقى

تصبحوا على خيرات

سلام ,,